ԱՀԵ․ հաճախ տրվող հարցեր
1․ Ես կդառնա՞մ որևէ կոնկրետ երեխայի հովանավորը։
Այո։ Երբ դուք դառնաք հովանավոր, կաջակցեք այն երեխային, ով դրա կարիքը ունի։ Ձեր նվիրատվությունն ուղղակիորեն կօգնի այդ երեխային՝ նրա բարեկեցությունը բարելավելու համար։
2․ Կարո՞ղ եմ շփվել իմ հովանավորյալ երեխայի հետ։
Այո։ ՀՕՖ-ը կապ է ստեղծում հովանավորների և նրանց աջակցած երեխաների միջև։ Եթե ցանկանում եք ուղարկել նամակ կամ հաղորդագրություն, պարզապես կապվեք ՀՕՖ-ի հետ, և մենք կիրականացնենք հաղորդակցությունը։ Նույն կերպ՝ երեխան կարող է գրել ձեզ, և մենք կփոխանցենք նրա նամակը կամ հաղորդագրությունը։ Անմիջական շփում հնարավոր չէ, սակայն անում ենք հնարավորը՝ հովանավորների և երեխաների միջև իմաստալից կապ ստեղծելու համար։
3․ Կարո՞ղ եմ այցելել իմ հովանավորյալ երեխային։
Եթե դուք Հայաստան եք ճանապարհորդում և ցանկանում եք հանդիպել ձեր հովանավորյալ երեխային, ՀՕՖ-ը կարող է կազմակերպել ձեր հանդիպումը երեխայի ընտանիքի հետ։ Նրանց համաձայնությունը ստանալուն պես մենք կհաստատենք հանդիպման ժամը և տեղը։
4․ Կարո՞ղ եմ ուղարկել լրացուցիչ նվերներ։
Այո, հովանավորները կարող են ուղարկել լրացուցիչ դրամական նվերներ հատուկ առիթների համար՝ ծննդյան օր, տոնակատարություններ կամ պարզապես հավելյալ աջակցություն ցուցաբերելու նպատակով։ Սակայն ներկայումս ապրանքի տեսքով նվերներ (ֆիզիկական իրեր) չեն ընդունվում։
5․ Իմ նվիրատվության քանի՞ տոկոսն է ուղղվում երեխային։
Ձեր հովանավորչական բոլոր միջոցները (100%) ուղղվում են անմիջապես երեխայի ընտանիքին՝ հոգալու կենսական անհրաժեշտությունները՝ հագուստը, դպրոցական պարագաները և սնունդը։
6․ Կարո՞ղ եմ հովանավորել ավելի քան մեկ երեխայի։
Իհարկե։ Կարիքը մեծ է, և մենք ողջունում ենք նրանց, ովքեր ցանկանում են աջակցել մի քանի երեխայի։ Եթե ունեք միաժամանակ մի քանի երեխայի աջակցելու հնարավորություն, ապա ձեր աջակցությունը կարող է ավելի մեծ փոփոխություններ բերել։
7․ Ի՞նչ է մանկապարտեզի սննդի ծրագիրը։
ԱՀԵ ծրագիրը, բացի անհատապես երեխաներին աջակցելուց, նաև աջակցում է Հայաստանում մանկապարտեզ հաճախող երեխաներին տրամադրվող սննդի ծրագրին։ Այս նախաձեռնությունը նպաստում է, որ փոքրիկները ստանան անհրաժեշտ սնունդ իրենց զարգացման, ֆիզիկական ու մտավոր աճի և ուսման համար։ Մանկապարտեզի սննդի ծրագրին փոխանցվող գումարները առանձնացված են և ուղղվում են միայն այս ծրագրին։